向來對黑色沒特別偏好，但在光影世界又特別嗜黑。所以好鍾意杜琪峯的電影世界，《PTU》入面成條廣東道得番幾盞街燈，《柔道龍虎榜》的酒吧終日不見天日，但兩種黑又有不同層次，不同暗示，是兩種興奮。
又可能是這份喜好，自己對添布頓的作品都有份情意結，這份結更早於1990年開始結下。1989年上畫的《蝙蝠俠》，細個時已極度恨睇，要知道元祖的蝙蝠俠是藍色緊身衫褲，冇諗過有人夠膽死將佢改做全黑，而這片黑來到今天第N代新版，都仍然keep住唔敢輕易修改。對當年的我嚟講，一心諗住《蝙蝠俠》係會動作連場，結果睇落其實似劇情片。又記得當年冇機會入戲院欣賞，是後來有個富貴同學話屋企人買咗隻LD，仲添置咗50吋投射大電視，於是一班朋友仔上佢屋企湊熱鬧。當年的LD是美版，需要配備一部字幕機。試幻想一個初中讀書仔，同一時間接觸到大電視、美版LD、字幕機幾樣高科技器材，然後是看一套恨睇咗一年，終於睇得到嘅電影，那份觀摩心態真係連字幕都覺得好睇啲。所以添sir在我心目，早就代表咗品味生活。
隨後的作品一直有追隨，要數最愛肯定是《朱古力獎門人》，成個故事好似為小朋友而設，無錯，我試過將呢套戲開俾小朋友睇，係睇得好鬼開心，但其實當中的細路角色，除了主角，個個都好想大巴大巴咁星埋去。又於是，當每位小朋友分別因為貪心、為食、好勝等性格而輸掉比賽，得到應得懲罰後，小矮人便會走出嚟唱歌夭膶下，係極之抵死好笑。基本上呢套係小朋友的《七宗罪》，係俾時下父母睇的，子女將來成才定闖禍，都係睇你今日點教佢。其中樂園的主題音樂〈Wonka's Welcome Song〉更是當日我的手機聆聲。
